Zenbaki bat baino
ez da, eta berez, zenbakiek ez dute ezer esaten. Zenbaki berak batzuetan kopuru
txikia adierazten du eta beste batzuetan sinestezina. Gaurkoa, sinestezina da.
13.472 lagun bildu ziren atzo Madrilen bigarren mailako emakumezko saskibaloi partida
bat ikustearren. 13.472. Estudiantesek 30 urte betetzen zuen, eta, ospatzeko, Magariñosetik
atera eta Wizink Centerera joan ziren. Talde honek bere egunekotasunean 600 bat
lagun inguru biltzen baditu ere, erakustaldia mundu osoa zeharkatzen ari da
arimak eta kontzientziak astinduz. Hesian taldeak abesten duen legez, “plazandreen
iraultza hasi egin da!”
Horrelako keinuak
gero eta gehiago ikusten ari gara. Futbolean, San Mames izan zen lehengoa, 48.121
zale bilduta. Pentsa! Izun bat eta guzti jaso izan behar zuen taldeak
harmailetan jende gehiegi sartzeagatik! Marka da gero! Anoeta etorri zen gero,
21.000 lagun bilduta euskal derbia jokatzeko. Saskibaloian eta Gasteizen,
Erreginaren Koparen finalean, Mendizorrotza jendez gainezka ikusi genuen (3.800
lagun baino gehiago). Gasteiz Irratiak Araskiren partida guztiak zuzenean
ematen ditu, eta hori oso keinu polita da baita ere. Gizarteak begiak ireki eta
beste mundu berri bat aurkitu du. Emakumezko kirola erakargarria da, eta ondo
landuta, negozio bilakatu daiteke. Baina, tamalez, ez dago ondo landuta. Keinuak
oso politak izanagatik ere, keinuak baino ez dira.
Emakumezko saskibaloiaren
egoerak izan behar lukeenatik oso urrun dago. Tokian tokiko taldea aztertzen
badugu, ikus dezakegu nola aurten bi jokalarik (Arrate Agirrek eta Ane Aldalurek)
taldea utzi behar izan zuten beraien lana eta kirola ezin uztartuz. Profesionalak
izan nahi zuten, baina gaur egun emakumezko saskibaloiak ez du hainbesterako
ematen. Hainbat taldek ezin dute entrenamendu arruntak antolatu, hiruzpalau
jokalari lanean edo ikasten daudelako, eta gauez entrenatu behar dute.
Bidaiatzeko orduan, autobusa eta autobusa, lekutan jokatuta ere… eta askotan
(gehienetan) hotelik gabe. Telebistan, partida bat baino ez, eta gainerakoak, Interneten
bidez (FEBTVek funtzionatzen duenean). Federazioa? Lehioetan eta selekzioei
buruz pentsatzen.
Keinuak oso
politak dira, baina keinuak dira. Gauza asko egiteke daude, eta horretarako
denok lan egin behar dugu, bakoitzak bere alorrean. Begiak ireki eta keinuen
ganora barnera dezagun; kontura gaitezen nola emakumezko saskibaloiarekiko
zaletasuna hazten ari den. Lagun diezaiegun egunero eta ez bakarrik egun
batean. Keinuak atzean utzi eta maite dugun hori babes dezagun egunero. Merezi
baitute.
Iruzkinak
Argitaratu iruzkina