Araskik bere
bizitzako kopa jokatuko du Gasteizen, eta aurrean izango duen taldea Cadi La
Seu izango da. Cadik ez du Girona edo Perfumeriasen entzutea, baina gauzak oso
ondo egiten ari dira eta konfiantza altuarekin helduko da Kopara.
Faboritoa?
Baliteke. Araskik baino bost partida gehiago irabazi ditu, eta lehenengo
itzulian, Gasteizen, 14 puntuko aldea atera gintuzten. Beraz, bai, faborito
soinekoa jarrita helduko dira, baina, horrek zer esan nahi du? Denok dakigun
legez, ezer ez! Kopa Gasteizen, gurean jokatuko da, Mendi beteta ikusiko dugu,
eta hori gutxi balitz bezala, Araskizaleak ez ezik beste bi euskal taldeko
zalegoek ere gure alde egingo dute. Ikusteke dago faboritoa izateak zer
dakarren.
Baina nolakoa da
Cadi la Seu? Zer jokalari ditu? Nola jokatzen dute? Uste dut gure aurkaria
aldez aurretik ezagututa askoz hobeto ikusiko dugula partida, beraz, Mendizorrotzara
abiatu baino lehen, bukaeraraino irakurtzea gomendatzen dizuet!
Cadi la Seu oso talde
gaztea da, eskarmentu handiko jokalari bi ditu, baina gainerakoak oso gazteak
dira, horrek dakarren gauza on eta txarrekin. Hala ere, iragan denboralditik
bloke nagusia mantentzea lortu dute, baita entrenatzailea ere. Agian
entrenatzailea izan daiteke talde honen giltzarria. Bernat Canut, bigarren entrenatzaile izatetik, behin-behineko entrenatzaile
bidea igaro eta taldearen zutabe izatera bilakatu da. Gaztea izan arren,
entrenatzaile bikaina. Baina zer nolako taldea kudeatzen du Bernatek? Azter dezagun!
Antolatzaileak
Taldeko antolatzaileak
Yurena Diaz eta Zuzanna
Sklepowicz dira. Yurenak eramaten du zama nagusia, Cadiren zutabe
bat izanda. Zuzanna oso jokalari gaztea da eta bere lehenengo denboraldia da
Poloniatik at, beraz laguntzeko dago. Yurena Kanaria Handian hazi eta jokalari
itzel bihurtu zen. Dia Ligan ez ezik Frantzian eta Polonian ere jardun zuen Cadi
La Seura itzuli baino lehen. Antolatzaile nabarmena da, indartsua, oldarkorra
eta jaurtitzaile bikaina (% 45 hirukoetan, taldeko jaurtitzailerik hoberena). Kontu
handia izango behar dugu Yurenarekin… Partida on bat jokatzen duen bakoitzean
Cadik garaipena lortzeko aukerak biderkatzen ditu. Izaskun Garciarekin lehia zirt
edo zartekoa izango da, Izaskunen defentsan giltzarri bat izango baitugu.
Hegalekoak:
Taldeko
hegalekoak Andrea Vilaro, Mehrin Kraker eta Irati Etxarri dira. Andrea Vilaro
Cadi La Seuren estandartea da. Katalanak bost urte egingo ditu Cadin eta
taldearen liderra edo liderretariko bat da. Jaurtiketetan pixka bat irregularra
da, baina bolada hartzen duenean partida suntzi dezake. Errebotean eta
defentsan asko laguntzen du, eta erantzukizuna hartzeko ez dauka arazorik. Gainera,
sasoi betean dago azken partidatan. Mehryn Kraker jaurtitzaile fina da, baina
jaurtitzeaz gain beste gauza asko egiten ditu. Oso jokalari indartsua da
amerikarra, eta bere bigarren denboraldian konfiantza, ezagutza eta eskarmentu
gehiagorekin jokatzen du, eta nabari zaio. Irati Etxarrik osatzen du hirukotea.
Ez dugu Irati aurkeztuko, Gasteizen ez baitu aurkezpenik behar baina zer edo
zer esatearren, Irati talentu hutsa dela esango nuke, lehundu beharreko
diamante bat. Etorikizuna Iratiren izena darama… Kanpotik taldea osatzeko, bi
jokalari gazte: Ana Palma eta Ariadna Pujol. Anak ez du ia jokatzen, eta
Ariadnak bai, hamar bat minutu jokatzen ditu neurketa bakoitzeko, baina pisu
gutxirekin.
Pibotak:
Barrutik, taldeko
kapitaina, Georgina Bahi Gironatarrak, Sheeresha Richardsek eta Merritt Hempek zama
gehiena eramango dute. “Geo” oso jokalari ona eta eskarmentu handikoa da.
Urtero-urtero jokoa hobetu du eta puntu eta errebote gehiago lortzen ditu. Barrutik
primeran moldatzen da, bereziki kanpotik barrura sartzen denean, baina hiruko
marratik ere sar dezake, eskumutur itzela baitauka. Aste honetan partida
bikaina burutu zuen gainera, beraz konfiantza askorekin helduko da. Richards
hegaleko pibot txikia? (1,82-1,83) da, baina oso indartsu eta boteretsua. Ez du
hiruko marra zapaltzen, baina egian esan ez du behar puntuak lortzeko. Bitxikeria
bat aitatzearren Netballetik dator, ez badakizue zer den, youtuben begiratu eta
harrituko zarete! (ni benaz harritu nintzen). Baina agian jokalaririk
boteretsuena barrutik Merritt Hempe izango litzateke. Altura eta pisu handikoa,
barrutik min handia egiten du, bai erasoan zein defentsan. Kanpotik ere jaurti
dezake, ez dauka portzentaia mingarririk, baina Umi Diallo barrutik atera
dezake eta arazoak sortu. Taldea barrutik Ainninna Aijanen osatzen du, gehiegi
ez badu jokatzen ere.
Ikus dezakezuenez,
talde luzea eta talentuz beteta. Gasteizko partida ikusita, gogoratzen dut nola
Hempek, Geok eta Vilarok min handia egin ziguten erasoan, eta erreboteetan,
bikoiztu gintuzten. Yurenak Izaskuni lehia zuzena irabazi zion, bereziki
erritmoan, eta Araskiren aldetik, Eduards eta Van del Aden izan ezik, partida
kaxkarra egin zuten gainerako jokalari guztiek. Agian hobe… Amorru bizian
aterako dira partida hori ahalik eta azkarren ahaz dezagun. Eta ahaztuko dugu,
ziur nago!
Zorte on, neskak!
Iruzkinak
Argitaratu iruzkina