Auzo lotsa

Asteburu gogorra igaro genuen, eta aste gogorra izaten ari da. Saskibaloia alde batera utzita, ikuskizuna irrati, egunkari eta zahiz beteta dauden telebista solasaldietara eraman du Real Madrilek, maite dugun hori guztiz kutsatuz. Penagarria, tamalgarria, onartezina.

Auzo lotsa pasatu genuen igandean epaileekin. Izugarrizko saskibaloi partida bat ikusita, luzapen eta guzti, partidaren protagonista bilakatu egin ziren azken minutu esplikaezin harengatik. Ez ditut hemen azkeneko hiru erabakiak berriro ere azalduko, denok buruan baitauzkagu, baina ezin izan zuten okerrago jokatu. Epaile batek, zuzeneko irudi bat ikusita, huts egin dezake, baina telebista eta instant replay lagun, onartezina da. Ez dut esango propio egin zutenik, ez dut uste eta, baina konpentsazio legea buruan izan zutela bai, hori bai uste dudala.

Auzo lotsa eman zuten Real Madrileko jokalariek, bereziki Felipe Reyesek eta Rudy Fernandezek. Aitortu behar dut salbuespen nabari bat egon zela, Llull alegia, Felipe eta Rudy garrasika zetozen bitartean 16 puntuko aldea galdu egin zutela gogoraraziz. Eta auzo lotsa astelehenean jarraitu egin zuen, are eta latzago. Lehenik bideo manipulatu bat bidaliz, eta gero mehatxuka. Mehatxu onartezinak, isun eredugarri bat merezi behar izan zutenak. Gezurra badirudi ere, hainbat eta hainbat titulu irabazi egin dituen talde batek, ez daki galtzen, irabazitako titulu asko “lapurtu” egin baditu ere (“era campo atrás”).

Auzo lotsa ACB ligak eman duena ere. Berandu eta apal jokatu du, ezer esan gabe, inor gaitzetsi gabe, harrotasunez jokatuz, antolakuntza (hainbat zaleen iritzietan kolokan dagoen antolakuntza) eta telebista goraipatuz eta beste alde batera begira. Antonio, elefante arrosa bat daukazu egongelan, ikusi nahi ez baduzu ere.

Eta bukatzeko, auzo lotsa irrati, telebista eta egunkari batzuetan. Auzo lotsa kazetari batzuek ematen dutena, auzo lotsa nola tratatzen duten saskibaloia, futbola balitz legez, eta auzo lotsa Real Madrilek daukan indar mediatikoa ikusteak.

Ahaz dezagun aurtengo Kopa hau ahalik eta azkarren, eta eman diezaiogun saskibaloiari betidanik izan duen begirunea eta duintasuna.